इजिप्टियन फरवार्ड मोहम्मद सलाहले बेञ्चबाट आएर कीर्तिमानी ह्याट्रिक प्रहार गरेपछि इंग्लिस क्लब लिभरपुलले युइएफए च्याम्पियन्स लिगमा सानदार जित दर्ता गरेको छ ।
लिभरपुलले स्कटिस क्लब रेन्जर्समाथि उसकै मैदानमा ७–१ को सानदार पूनरागमन जित दर्ता गरेको हो । लिभरपुलको जितमा सलाहले ह्याट्रिक पूरा गर्दा रोबर्टाे फिर्मिनोले दुई तथा डार्विन नुनेज र हार्भे इलिओटले समान एक गोल गरे । घरेलु टोलीका स्कट अर्फिल्डको गोल सान्त्वना बन्यो ।
आइब्रक्स स्टेडियम ग्लास्गोमा बुधबार राति गोलको वर्षा भएको खेलमा घरेलु टोलीले खेलको १७औं मिनेटमा लिभरपुलविरुद्ध अग्रता लिन सफल भएको थियो । स्कट अर्फिल्डले रायन ज्याकको पासमा गोल गर्न सफल भएका थिए ।
२४औं मिनेटमा रोबर्टाे फिर्मिनोले गोल गर्दै खेललाई १–१ गोलको बराबरीमा ल्याए । उनले कोन्स्टाटिनोस टिसिमकासको पासमा गोल गर्न सफल भएका थिए ।
५५औं मिनेटमा फिर्मिनोले जोसेप गोमेजको पासमा व्यक्तिगत र टोलीका लागि दोस्रो गोल गरेपछि लिभरपुल खेलमा २–१ ले अघि बढ्यो । ६६औं मिनेटमा फिर्मिनोको पासमा डार्विनले गोल गर्दै लिभरपुललाई सहज जिततर्फ अघि बढाए ।
त्यसपछिको तीन गोल परिवर्तित खेलाडी सलाहको नाममा रह्यो । उनले तीनै गोल डिएगो जोटाको पासमा गोल गर्न सफल भएका थिए । सलाहले ६ मिनेट १२ सेकेन्डको अन्तरमा ह्याट्रिक पूरा गर्दै च्याम्पियन्स लिगमा सबैभन्दा छिटो ह्याट्रिक पुरा गर्ने कीर्तिमान बनाएका छन् ।
यसअघि सबैभन्दा छिटो ह्याट्रिक गर्नै कीर्तिमान फ्रेन्च क्लब लियोनका बाफेटिम्वी गोमिसको नाममा रहेको थियो । उनले सन् २०११ मा डिनामो जाग्रिवविरुद्ध ७–१ को जितमा ८ मिनेटको अन्तरमा ह्याट्रिक पूरा गर्दै कीर्तिमान बनाएका थिए ।
६८औं मिनेटमा डार्विन नुनेजको स्थानमा मैदान छिरेका सलाहले ७६औं मिनेटमा डिएगो जोटाको पासमा पहिलो गोल गर्दा लिभरपुल खेलमा ४–१ ले अघि बढ्यो । ८०औं मिनेटमा सलाहले जोटाकै पासमा गोल गर्न सफल हुदा लिभरपुलले ५–१ को अग्रता लिन सफल भयो ।
त्यसको एक मिनेटपछि सलाहले जोटाकै ह्याट्रिक असिस्टमा ह्याट्रिक पूरा गरेपछि लिभरपुलले खेलमा ६–१ को आरामदायी स्थितिमा अघि रह्यो । त्यसपछि ८७औं मिनेटमा हार्भे इलिओटले गोल गर्दै लिभरपुलको फराकिलो जित सुनिश्चित गरे ।
यस जितसँगै लिभरपुल समूह ‘ए’ मा ९ अंक जोडेर नकआउट चरण नजिक पुगेको छ । पराजित रेन्जर्स अंकविहीन हुँदै पुछारमा छ ।
यही समुहको अर्काे खलमा डच क्लब आयाक्सलाई ४–२ ले हराएर इटालियन क्लब नेपोली समूह चरणको दुई खेल बाँकी छँदै खेलेको सबै चार खेलमा जितसहित प्रि–क्वाटरफाइनलमा प्रवेश गरेको छ ।
नेपोलीको जितमा हिर्भिङ लोजानो, जियाकोमो रास्पडोरी, कभिचा केभाराटकेलिया र भिक्टर ओसिमहेनले गोल गरे । आयाक्सका डाभी क्लासेन र स्टेभन वर्गवाइनले गोल फर्काए ।
यो जितसँगै नेपोलीले ४ खेलबाट शतप्रतिशत जित जितसहित १२ अंक जोडेर शीर्षस्थानमा रह्यो । पराजित आयाक्स ३ अंक जोडेर तेस्रो स्थानमा रहेको छ ।
