बलात्कार गरेको आरोप लागेपछि सन्दीप लामिछानेलाई नेपाल क्रिकेट संघ (क्यान) ले राष्ट्रिय क्रिकेट टिमबाट निलम्बन गरेको छ ।
सन्दीपविरुद्ध उजुरी परेको सार्वजनिक भएको दुईदिनपछि काठमाडौं जिल्ला अदालतबाट पक्राउ पुर्जी समेत जारी भएको अवस्थामा क्यानको कार्यसम्पादन समितिको निर्णयले सन्दीपलाई निलम्बन गरेको कार्यवाहक सचिव प्रशान्त विक्रम मल्लले जानकारी दिए ।
मंगलबार प्रहरी वृत्त गौशालामा जाहेरी परेसँगै प्रहरीले प्रमाणहरू संकलन गर्न थालेको जनाएको थियो । प्रहरीले उनीहरू कोठा नम्बर ३०५ मा बसेको बताएको छ । होटलमा करिब ७ घन्टा बसेर भदौ ६ गते बिहान ६ः४६ मा उनीहरु होटलबाट फकिएको फुटबजमा देखिएको बताइएको छ । सन्दीपलाई पक्राउ गर्न बिहीबार पक्राउ पुर्जी समेत जारी भइसकेको छ ।
नेपाली क्रिकेट टोली भदौ ६ गते मा केन्या प्रस्थान गरेको थियो । उक्त समयमा सन्दीप सहित ११ खेलाडी केन्या गएका थिए । केन्यासँगको पाँच टि२० आई सिरिज नेपालले ३–२ ले जितेको थियो । कप्तान सन्दीप टि२० आई सिरिजमा प्लेयर अफ द सिरिज चुनिएका थिए ।
सन्दीपले केन्यासँगको तीन एकदिवसिय अभ्यास खेल भने खेलेका थिएनन् । क्यारेवियन प्रिमियर लिग (सिपिएल) खेल्न वेस्टइन्जि गएपछि तीन एकदिवसिय अभ्यास खेल गुमाएका थिए । रोहित पौडेलको कप्तानीमा नेपालले उक्त सिरिज क्लिनस्विप गरेको थियो । सिपिएलमा सन्दीप जमैका तलवाजको टोलीमा छन् । तर यता बलात्कारको आरोप लागेपछि उनी नेपाल फर्किने सम्भावना छ । सन्दीपबाहेकको टोली बुधबार स्वदेश आइसकेको छ ।
सन्दीपको कप्तानीमा नेपालले गत वर्ष ओमानमा टि२० विश्वकप छनोटमा सेमिफाइनल युएईसँग पराजित हुँदै आगमी अक्टोबर नोभेम्बरमा अष्ट्रेलियामा हुने टि२० विश्वकप गुमाएको थियो । सन्दीपले नेपालबाट १४ ओडिआई खेलमा कप्तानी गर्दा ४ मा जित, ९ मा हार र १ मा टाई गराएका छन् । टि२० आईमा भने सन्दीपले १८ खेलमा १३ मा जित र ५ मा हार बेहोरेका छन् । नौ महिना उनको कप्तानी औसत रहँदै आएको थियो ।
सन्दीपले २०१६ मा कीर्तिपुर मैदानमा नामिबियाविरुद्ध लिष्ट ए मार्फत नेपाली क्रिकेटमा डेब्यू गरेका थिए । त्यसपछि सन्दीपले नेपालबाट ३० ओडिआई, ४४ टि२० आई र ५४ लिष्ट ए खेल खेलेका छन् । सन्दीपले ओडिआईमा ६९ विकेट लिनुको साथै १ सय ७० रन बनाएका छन् । टि२० आईमा सन्दीपले ८५ विकेट लिएका छन् ।
२०१६ को यू–१९ विश्वकपबाट उदाएका सन्दीप नेपाली क्रिकेट टोली, इन्डियन प्रिमियर लिग (आइपिएल), बिग ब्यास लिग लगायत विश्व चर्तित विदेशी टि२० फ्रेन्चाइज लिग हुँदै ६ वर्षमा नेपाली टोलीको नेतृत्व गरेका थिए ।
सन्दीपले २०१६ को यू१९ विश्वकपमा ह्याट्रिकसहित ६ खेलमा १४ विकेट लिँदै विश्व क्रिकेटमा सनसनी मच्चाएका थिए । २०१६ मा श्रीलंकामा भएको यू–१९ एसिया कपमा नेपालको नेतृत्व गरेका थिए ।
२०१७ मा सन्दीपलाई हटाएर नेपालले दीपेन्द्रलाई यू–१९ को कप्तानी जिम्मेवारी दिएको थियो । दीपेन्द्रको कप्तानीमा नेपाली यू–१९ टोलीले २०१७ मा भारतीय यू–१९ टोलीलाई १९ रनले हराउँदै सनसनी मच्चाएको थियो । २०१९ मा पारसले छाडेपछि दीपेन्द्र नेपालको उपकप्तान बनेका थिए ।
तर अनुशासनको कारण क्यानले ज्ञानेन्द्रसँगै दीपेन्द्रलाई हटाएको थियो । सन्दीप पोखरा प्रिमिपर लिग, काठमाडौं मेयर्स कप र एभरेष्ट प्रिमियर लिगमा पनि कप्तानी गरिसकेका छन् । रोहित पौडेलले कप्तानी सम्हाल्ने सम्भावना छ । उनले सन्दीपको अनुपस्थीतिमा यसै साता केन्यासँगको तीन एकदिवसिय अभ्यास खेलमा कप्तानी गर्दै क्लिनस्विप गराएका थिए । रोहित उप कप्तान रहँदै आएका छन् ।
