सुरुवाती अग्रता जोगाउन नसक्दा शीर्षस्थानमा रहेको लन्डन क्लब आर्सनल इंग्लिस प्रिमियर लिगमा बराबरीमा रोकिएको छ । आर्सनल घरेलु मैदानमा ब्रेन्टफर्डसँग १–१ गोलको बराबरीमा रोकिएको हो ।
इमिरेट्स स्टेडियम लन्डनमा शनिबार राति भएको खेलमा आर्सनलका लियान्द्रो ट्रोससार्ड गोल गर्दा ब्रेन्टफर्डका इभान टोनीले बराबरी गोल फर्काए । घरेलु मैदानमा आर्सनलले खेलको सुरुवातदेखि नै पाहुना टोलीमाथि दवाव बढाएपनि गोलको लागि दोस्रो हाफ नै कुर्नुपरेको थियो ।
६६औं मिनेटमा लियान्द्रो ट्रोससार्डले गोल गर्दै आर्सनललाई १–० को अग्रता दिलाए । उनले बुकायो साकाको पासमा गोल गर्न सफल भएका थिए । तर, आर्सनलले त्यो अग्रतालाई जोगाउन सकेन ।
७४औं मिनेटमा इभान टोनीले गोल गर्दै खेललाई १–१ गोलको बराबरीमा ल्याए । उनले क्रिष्टियन नोरगार्डको पासमा गोल गर्न सफल भएका थिए । त्यसपछि थप गोल निस्कन नसक्दा खेल बराबरीमा सकियो ।
यो बराबरीपछि आर्सनलले शीर्षस्थानमा आफ्नो अग्रतालाई बढाउने मौका गुमाएको छ । आर्सनलको २१ खेलबाट ५१ अंक छ ।समान खेलबाटै दोस्रो स्थानको म्यानचेस्टर सिटीको ४५ अंक छ । ब्रेन्टफर्ड २२ खेलबाट ३४ अंक जोडेर आठौं स्थानमा छ ।
अन्य नतिजा
वेस्ट ह्यामविरुद्ध चेल्सी (१–१)
क्रिस्टल प्यालेसविरुद्ध ब्राइटन (१–१)
लेस्टर सिटीविरुद्ध टोटेनहम (४–१)
साउथह्याम्टनविरुद्ध वल्भ्स (१–२)
फुलहमविरुद्ध नटिङहम (२–०)
बर्नमाउथविरुद्ध न्यूक्यासल (१–१)
