पोलिस फरवार्ड रोवर्ट लेवान्डोस्कीको दुई गोलमा क्याटलान क्लब बार्सिलोना युइएफए च्याम्पियन्स लिगमा हारबाट जोगिएको छ ।
बार्सिलोनाले घरेलु मैदानमा शुरुवाती अग्रता लिनका बावजुत खेलमा दुईपटक पछि पर्दा इटालियन क्लब इन्टर मिलानसँग ३–३ गोलको बराबरी खेलेको हो ।
नोउ क्याम्पमा बुधबार राति भएको खेलमा इन्टरविरुद्ध घरेलु टोलीका लेवान्डोस्कीले दुई तथा औसमाने डेम्वेलेले एक गोल गरे । इन्टरका निकोलो बरेल्ला, लोउटारो मार्टिनेज र रोविन गोसेन्सले गोल गरे ।
‘गर या मर’ को स्थिति रहेको यस खेलमा जित निकाल्न नसक्दा बार्सिलोनामाथि दवाव यथावत छ । अन्तिम समयमा लेवान्डोस्कीले गोल गर्दै इन्टरलाई रोक्न सफल भएपछि बार्सिलोनाको प्रि–क्वाटरफाइनलमा पुग्ने सम्भावना झिनो रहेको छ ।
टोलीलाई नकआउट चरण प्रवेश गर्न अब बाँकी रहेको दुवै खेलमा जित आवश्यक छ तर, समुह चरणको पाँचौ खेलमा इन्टरले भिक्टोरिया प्लेजेनलाई हराएमा बार्सिलोना समूह चरणबाट बाहिरिदै युरोपा लिगमा धकेलिनेछ । बार्सिलोनाले आफ्नो दुवै खेलमा जित र इन्टरले आफ्नो दुवै खेलमा अंक गुमाउनुपर्नेछ ।
प्रतिक्षित खेलको ४०औं मिनेटमा औसमाने डेम्वेलेले गोल गर्दै बार्सिलोनालाई सुरुवाती अग्रता दिलाए । सर्जी रोबर्टाेको क्रस पासलाई डेम्वेलेले वान टचमै बललाई जाली चुमाएका थिए ।
५०औं मिनेटमा निकोलो बरेल्लाले गोल गर्दै इन्टरलाई खेलमा फर्काए । एलेसान्द्रो बास्टोनीको पासमा उनले सानदार फिनिसिङको नमुना पेश गरेका थिए । ६३औं मिनेटमा लोउटारो मार्टिनेजले गोल गर्दै इन्टरलाई खेलमा २–१ ले अघि बढाए ।
हकान चलहानो ग्लुको पासमा मार्टिनेजले एरिक गार्सियालाई बिट गर्दै गरेको प्रहार माथिल्लो पोस्टर तल्लो पोस्टमा लाग्दै गोलमा परिणत हुँदा गोलरक्षक मार्क आन्दर टेर स्टेगन मुकदर्शक बने ।
८२औं मिनेटमा लेवान्डोस्कीले गोल गर्दै खेललाई २–२ गोलको बराबरीमा ल्याए । ८९औं मिनेटमा रोविन गोसेन्सले गोल गर्दै इन्टरलाई पुनः खेलमा ३–२ ले अघि बढाए । उनले मार्टिनेजको पासमा गोल गर्न सफल भएका थिए ।
त्यसपछि इन्ज्युरी समयको थप गरिएको दोस्रो मिनेटमा लेवान्डोस्कीले एरिक गार्सियाको पासमा व्यक्तिगत दोस्रो र टोलीका लागि तेस्रो गोल गर्दै बार्सिलोनालाई हारबाट जोगाएर अघिल्लो चरण प्रवेश गर्ने सम्भावना कायमै राखे । इन्ज्युरी समयको थप गरिएको सातौं मिनेटमा इन्टरका प्रशिक्षक सिमोन इन्जाघी रातो कार्ड खाँदै टचलाई छाड्न बाध्य भए ।
यस बराबरीसँगै समूह ‘सी’ मा इन्टर ४ खेलबाट ७ अंक जोडेर दोस्रो स्थानमा यथावत रहँदा बार्सिलोना पनि ४ अंक जोडेर तेस्रो स्थानमा यथावत छ । बायर्न ४ खेलबाट १२ अंक जोडेर अघिल्लो चरणमा प्रवेश गर्दा भिक्टोरिया प्लेजेन अंकविहीन हुँदै पुछारमा छ ।
