इंग्लिस प्रिमियर लिगमा लिभरपुल घरेलु मैदानमा लिड्स युनाइटेडसँग स्तब्ध बन्दा टोटेनहम हटस्परले सानदार पूनरागमन जित निकालेको छ ।
लिभरपुल लिड्ससँग २–१ ले स्तब्ध बनेको हो । लिभरपुललाई स्तब्ध पार्न लिड्सका रोड्रिगो र क्रिसेन्सियो समरभिलले गोल गरे । लिभरपुलका मोहम्मद सलाहले एक गोल फर्काए ।
एनफिल्डमा शनिबार राति भएको खेलको चौथो मिनेटमा रोड्रिगोको गोलबाट लिभरपुल खेलमा पछि परेको थियो । जोसेफ गोमेजले दिएको ब्याक पासमा गोलरक्षक एलिसन बेकर झुकिन पुग्दा रोड्रिगोले खाली पोस्टमा गोल गरेका थिए ।
१४औं मिनेटमा सलाहले गोल गर्दै खेललाई १–१ गोलको बराबरीमा ल्याए । उनले एन्ड्रिउ रोबर्टसनको पासलाई सदुपयोग गरेका थिए । त्यसपछि बराबरीतर्फ धकेलिएको खेलको अन्तिम समयमा क्रिसेन्सियो समरभिलले गोल गर्दै लिभरपुललाई २–१ ले स्तब्ध पारे । उनले प्याट्रिक बामफोर्डको पासमा गोल गर्न सफल भएका थिए ।
यस नतिजासँगै लिड्स १२ खेलबाट १२ अंक जोडेर १५औं स्थानमा उक्लिएको छ । पराजित लिभरपुल १६ अंक जोडेर नवौं स्थानमा झरेको छ ।
अर्काे खेलमा टोटेनहमले बर्नमाउथसँग २–० ले पछि परेको स्थिति उल्ट्याएर ३–२ को सानदार पूनरागमन जित निकालेको छ ।बर्नमाउथका काइफर मुरले दुई गोल गर्दा टोटेनहमका रायन सेसेगनन, बेन डेभिस र रोड्रिगो बेन्टानकरले गोल गरे ।
यस जितसँगै टोटेनहम १३ खेलबाट २६ अंक जोडेर तेस्रो स्थानमा यथावत रहेको छ । पराजित बर्नमाउथ १३ अंक जोडेर १४औं स्थानमा रहेको छ ।
अर्काे खेलमा न्यूक्यासल युनाइटेडले एस्टन भिल्लालाई ४–० को भारी अन्तरले पराजित गरेको छ । क्रिस्टल प्यालेसल साउथह्याम्टनलाई १–० ले हराउँदा ब्रेन्टफर्ड र वल्भ्सले १–१ गोलको बराबरी खेल्दै अंक बाँडेका छन् ।
