एजेन्सी – पोर्चुगिज फरवार्ड क्रिस्टियानो रोनाल्डोले आफ्नो समर्थकको इन्स्टाग्राममा कमेन्ट गर्दै दुखेसो पोखेका छन् । रोनाल्डो र म्यानचेस्टर युनाइटेडको विषयमा भइरहेको चर्चालाई उनले झुट रहेको भन्दै असन्तुष्टि व्यक्त गरेका हुन् ।
समर्थक लेन्दारियोले आफ्नो अकाउन्टमा एटलेटिको म्याड्रिडले उनलाई अनुबन्ध गर्न चाहेपनि समर्थकको विरोधका कारण क्लब अघि नबढेको लेखेका थिए । क्लबले उनलाई आर्थिक कारण पनि अनुबन्ध गर्न नसक्ने लेखिएको छ । सँगसँगै लेन्दारियोले युनाइटेड रोनाल्डोको लागि ठिक क्लब नरहेको र चाडै क्लब छोडेको हेर्ने रहर रहेको बताए । यसबाहेक मिडियाले रोनाल्डोको नाममा झुट लेखेको पनि उल्लेख गरिएको छ ।
रोनाल्डोले उक्त पोस्टमा दुई कमेन्ट गरेका छन् । एक कमेन्टमा उनले लेन्दारियोको पोस्टमा सहमति जनाउँदै धेरै पछि उनको एकाउन्टमा पुगेको लेखेका छन् । अर्को कमेन्टमा भने रोनाल्डोले मिडियाले झुट बोलेको बताएका छन् । रोनाल्डोले केही सातामा अन्तर्वार्तामार्फत सबै कुरा प्रष्ट पार्ने जनाएका छन् । उनले पछिल्लो महिना १ सय समाचारमा ५ मात्र सत्य रहेको पनि बताए ।
रोनाल्डोले सिजनमा निकै खराब सुरुवात गरेपछि क्लब समर्थकहरु पनि उनीसँग सन्तुष्ट छैनन् । नयाँ प्रशिक्षकको आगमनपछि रोनाल्डो थप असन्तुष्ट रहेको बुझिएको छ । यसैपनि च्याम्पियन्स लिग खेल्न चाहने उनको इच्छा रहेकाले क्लब छाड्ने सम्भावना बलियो छ ।
