शीर्ष दौडमा रहेको रियल म्याड्रिड स्पेनिस ला लिगामा बराबरीमा रोकिएको छ । रियल घरेलु मैदानमा रियल सोसिडाडसँग गोलरहित बराबरीमा रोकिएको हो ।
सान्टियागो बर्नबेउमा आइतबार राति भएको खेलमा घरेलु टोली रियलले पाहुना टोलीलाई लगातार दवावमा राखेपनि रियल बेटिसको बलियो रक्षापङ्ति तोड्न नसक्दा बराबरीमा रोकिन बाध्य बन्यो ।
रियल सोसिडाडका गोलरक्षक एलेक्स रेमिरोले रियलको एकपछि अर्काे प्रहारलाई निस्तेज पार्दै टोलीलाई रियलबाट अंक दिलाउन सफल भए ।
रेमिरोले रियलका कप्तान करिम बेन्जेमा, भिनिसियस जुनियर, रोड्रिगो, फेडे भाल्भेर्डे, लुका मोड्रिच र टोनी क्रुसलगायतको प्रहारलाई फिल पारेका थिए ।
यस बराबरीसँगै रियल शीर्षस्थानको क्याटलान क्लब बार्सिलोनासँग ५ अंकले पछि परेको छ । रियलको १८ खेलबाट ४२ अंक पुगेको छ । शीर्षस्थानको बार्सिलोनाको ४७ अंक छ । रियल सोसिडाड १९ खेलबाट ३९ अंक जोडेर तेस्रो स्थानमा यथावत रहेको छ ।
