फरवार्ड मार्कस रासफर्डले दुई गोल तथा मिडफिल्डर ब्रुनो फर्नान्डेसले दुई असिस्ट प्रदान गरेपछि म्यानचेस्टर युनाइटेडले इंग्लिस प्रिमियर लिगमा सानदार जित दर्ता गरेको छ ।
युनाइटेडले घरेलु मैदानमा लेस्टर सिटीलाई ३–० ले पराजित गरेको हो । एक गोल जेडान सान्चोको नाममा रह्यो । ओल्ड ट्राफोर्डमा आइतबार राति भएको खेलको २५औं मिनेटमा मार्कस रासफर्डको गोलबाट युनाइटेडले पहिलो हाफमा १–० को अग्रता लिन सफल भयो । उनले ब्रुनो फर्नान्डेसको पासमा गोल गर्न सफल भए ।
५६औं मिनेटमा रासफर्डले फ्रेडको पासमा व्यक्तिगत र टोलीका लागि दोस्रो गोल गर्दै युनाइटेडलाई खेलमा २–० को अग्रता दिलाए ।
६१औं मिनेटमा परिवर्तित खेलाडी जेडान सान्चोले गोल गर्दै युनाइटेडको ३–० को जित सुनिश्चित गरे । ४६औं मिनेटमा एलेहान्द्रो गर्नाचोको स्थानमा मैदान छिरेका सान्चोले ब्रुनो फर्नान्डेसको पासलाई सदुपयोग गरेका थिए ।
यस जितसँगै युनाइटेड २४ खेलबाट ४९ अंक जोडेर तेस्रो स्थानमा यथावत रहेको छ । युनाइटेड शीर्षस्थानको आर्सनलसँग ५ तथा दोस्रो स्थानको म्यानचेस्टर सिटीसँग ३ अंकले पछि छ ।
चौथो स्थानको टोटेनहमलाई ७ अंकले पछि पारेको छ । पराजित लेस्टर २३ खेलबाट २४ अंक जोडेर १४औं स्थानमा छ ।
