सिरी ‘ए’ प्रतिद्धन्द्धी लाजियोमाथि कठिन जित निकाल्दै युभेन्ट्स कोपा इटालियाको सेमिफाइनलमा प्रवेश गरेको छ ।
युभेन्ट्सले घरेलु मैदानमा लाजियोमाथि १–० को कठिन जित निकाल्दै अन्तिम चारमा स्थान पक्का गरेको हो । युभेन्ट्सको जितमा पहिलो हाफमा ग्लेइसन ब्रेमेरले गरेको गोल नै निर्णायक बन्यो । उनले ४४औं मिनेटमा फिलिप कोस्टिकको पासमा गोल गर्न सफल भएका थिए ।
एक गोलले पछि परेको लाजियोले दोस्रो हाफमा घरेलु टोलीलाई दवावमा राखेपनि युभेन्ट्सले आफ्नो अग्रता जोगाउँदै जित निकाल्न सफल भयो । युभेन्ट्सको जितसँगै कोपा इटालियाको सेमिफाइनल समिकरण पूरा भएको छ ।
अब सेमिफाइनलमा युभेन्ट्सले इन्टर मिलानको सामना गर्नेछ । अर्काे सेमिफाइनलमा क्रेमोनेस र फियोरेन्टिनाबीच प्रतिस्पर्धा हुनेछ ।
सेमिफाइनल दुई लेगमा हुनेछ । पहिलो लेगका खेलहरु ५ अप्रिलमा तथा दोस्रो लेगका खेलहरु २६ अप्रिलमा हुनेछ । फाइनल २४ मेमा हुनेछ ।
