एस्टन भिल्लामाथि सहज जित हात पार्दै म्यानचेस्टर सिटीले इंग्लिस प्रिमियर लिगमा शीर्षस्थानमा रहेको आर्सनलसँगको अंक दुरी छोट्याएको छ ।
सिटीले घरेलु मैदानमा एस्टन भिल्लालाई ३–१ ले पराजित गर्दै आर्सनलसँगको अंक दुरी ३ मा छोट्याएको छ । इतिहाद स्टेडियम म्यानचेस्टरमा आइतबार राति भएको खेलमा सिटीको सहज जितमा रोड्री, इल्केए गुन्डोगान र रियाद महारेजले गोल गरे । भिल्लाका ओली वाटकिन्सले एक गोल फर्काए ।
खेलको चौथो मिनेटमा नै रोड्रीको गोलबाट सिटीले खेलमा १–० को अग्रता लिन सफल भयो । उनले रियाद महारेजको पासमा गोल गर्न सफल भएका थिए । ३९औं मिनेटमा गुन्डोगानले एर्लिङ ब्राउट हालान्डको पासमा गोल गर्दै सिटीको अग्रता दोब्बर पारे ।
पहिलो हाफको इन्ज्युरी समयको थप गरिएको पहिलो मिनेटमा रियाद महारेजले पेनाल्टीमा गोल गर्दै सिटीलाई पहिलो हाफमा ३–० को अग्रता दिलाए । ज्याक ग्रेलिसलाई पेनाल्टी बक्समा जाकोव राम्सीले फउल गरेपछि रेफ्रीले सिटीलाई पेनाल्टी प्रदान गर्दा महारेज चुकेनन् ।
६१औं मिनेटमा ओली वाटकिन्सले गोल गर्दै खेललाई ३–१ को स्थितिमा ल्याएपनि त्यसपछि थप गोल निस्कन नसक्दा सिटी विजयी हुन सफल भयो । उनले डगलस लुइजको पासलाई सदुपयोग गरेका थिए ।
यस जितसँगै दोस्रो स्थानमा रहेको सिटीको २२ खेलबाट ४८ अंक पुगेको छ । एक खेल कम खेलेको शीर्षस्थानको आर्सनलको ५१ अंक छ । पराजित भिल्ला २८ अंक जोडेर ११औं स्थानमा छ ।
