बर्नमाउथमाथि सहज जित हात पार्दै म्यानचेस्टर युनाइटेडले इंग्लिस प्रिमियर लिगमा शीर्ष चारमा बलियो पकड बनाउन सफल भएको छ ।
युनाइटेडले घरेलु मैदानमा ३–० को सहज जित हात पारेको हो । युनाइटेडको जितमा क्यासेमिरो, लुके सा र मार्कस रासफर्डले गोल गरे ।
ओल्ड ट्राफोर्डमा मंगलबार राति भएको खेलको २३औं मिनेटमा मिडफिल्डर क्यासेमिरोको गोलबाट युनाइटेडले सुरुवाती अग्रता लिएको थियो । उनले क्रिष्टियन एरिक्सनको पासमा गोल गर्न सफल भएका थिए ।
४९औं मिनेटमा एलेहान्द्रो गर्नाचोको पासमा लुके साले गोल गर्दै युनाइटेडको अग्रता दोब्बर पारे । त्यसपछि निर्धारित समयको खेल सकिन ४ बाँकी रहँदा मार्कस रासफर्डले गोल गोल गर्दै युनाइटेडको जित पक्का गरे ।
यस जितसँगै चौथो स्थानमा रहेको युनाइटेडको १७ खेलबाट ३५ अंक पुगेको छ । एक खेल बढी खेलेको न्यूक्यासलको पनि ३५ अंक रहेपनि गोल अन्तरमा तेस्रोमा छ । पराजित बर्नमाउथ १८ खेलबाट १६ अंक जोडेर १५औं स्थानमा छ ।
