इंग्लिस क्लब म्यानचेस्टर युनाइटेडले युरोपा लिगको समूह चरणको पहिलो खेलमा हार बेहोरेको छ । युनाइटेड घरेलु मैदानमा स्पेनिस क्लब रियल सोसिडाडसँग १–० ले पराजित भएको हो ।
ओल्ड ट्राफोर्डमा बिहीबार राति भएको खेलमा सोसिडाडको जितमा दोस्रो हाफका ब्राइस मेन्डिसले पेनाल्टी मार्फत गरेको गोल नै निर्णायक बन्यो । उनले ५९औं मिनेटमा गोल गरेका थिए ।
बल पोसेसन राख्दै पाहुना टोलीमाथि दवाव सिर्जना गरेपनि फिनिसिङमा चुक्दा युनाइटेड घरेलु मैदानमा पराजित हुन पुग्यो ।यही समूह ‘ई’ को अर्काे खेलमा एफसी सेरिफले ओमोनिया निकोसियालाई ३–० ले पराजित गरेको छ ।
यस नतिजासँगै सेरिफ ३ अंक जोडेर शीर्षस्थानमा रहेको छ । समान ३ अंक नै रहेपनि सोसिडाड दोस्रो स्थानमा तथा युनाइटेड तेस्रो तथा निकोसिया पुछारमा छ ।
