इन्ज्युरी समयमा स्कट म्याकटोमिनेले गोल गरेपछि इंग्लिस क्लब म्यानचेस्टर युनाइटेडले युरोपा लिगमा संघर्षपूर्ण जित निकालेको छ ।
युनाइटेडले घरेलु मैदानमा साइप्रसको ओमोनिया निकोसियामाथि १–० को झिनो जित निकालेको हो । युनाइटेडको जितमा खेलको इन्ज्युरी समयको थप गरिएको तेस्रो मिनेटमा म्याकटोमिनेले गरेको गोल नै निर्णायक बन्यो ।
यस जितसँगै युनाइटेड समूह ‘सी’ मा ४ खेलबाट ९ अंक जोडेर दोस्रो स्थानमा यथावत रहेको छ । पराजित निकोसिया अंकविहीन हुँदै पुछारमा छ ।
यही समूहको अर्काे खेलमा स्पेनिस क्लब रियल सोसिडाडले १० खेलाडीमा समेटिएको मोल्दोभाको एफसी सेरिफलाई ३–० ले पराजित गर्दै आफ्नो शीर्षता यथावत राखेको छ ।
सोसिडाडको जितमा एलेक्सान्डर सोर्लाेथ, डिएगो रिको र रोबर्ट नाभारोले गोल गरे । एफसी सेरिफ ३३औं मिनेटमा १० खेलाडीमा समेटिन पुग्दा त्यसपछि सोसिडाडले सबै तीन गोल गरेको थियो ।
यस जितसँगै रियल सोसिडाड लगातार चार खेलमा जित निकाल्दै १२ अंक जोडेर शीर्षस्थानमा रहेको छ । पराजित सेरिफ ३ अंक जोडेर तेस्रो स्थानमा छ ।
