काठमाडौं, ७ पुस। विश्व च्याम्पियन लियोनल मेस्सीले फ्रेन्च क्लब पेरिस सेन्ट जर्मेन (पिएसजी) सँग एक वर्षको सम्झौता नविकरण गर्ने भएका छन् । मेस्सीले सन् २०२४ सम्म फ्रेन्च राजधानी बस्ने निर्णय गरेको अन्तर्राष्ट्रिय मिडियाले जनाएका छन् ।
गत आइतबार मेस्सीको कप्तानीमा रहेको अर्जेन्टिनाले फ्रान्सलाई पराजित गर्दै विश्वकप जितेको थियो । मेस्सीले आफ्नो खेल जिवनमा पहिलो पटक विश्वकपको ट्रफी उचालेका थिए ।
३५वर्षीय मेस्सी विश्वकपसँगै करियरमै उच्च लयमा छन् । मेस्सी सन् २०१५ पछि च्याम्पियनन्स लिग उपाधि जित्ने योजनामा छन् । बार्सिलोनाका उपाधिको चाङ लगाएका मेस्सी पिएसजीमा समेत सोहि अवस्था सिर्जना गर्न चाहन्छन् ।
अहिले भने मेस्सी अर्जेन्टिनाको विजयी र्यालीमा समावेश छन् । उनी अझै केहि साता अर्जेन्टिनामै रहन सक्छन् । मेस्सी फर्किएसँगै सम्झौतामा हस्ताक्षर हुने बताइएको छ । पिएसजी अध्यक्ष नासिर अल खेलाफि र स्पोर्टस् डाइरेक्टर लुइस काम्पोस तयार अवस्थामा रहेका छन् ।
