ब्रेन्टफर्डमाथि सहज जित निकाल्दै आर्सनल इंग्लिस प्रिमियर लिगको शीर्षस्थानमा उक्लिएको छ । आर्सनलले घरेलु टोलीमाथि ३–० को जित निकाल्दै म्यानचेस्टर सिटीलाई पछि पार्दै शीर्षस्थानमा फर्किएको हो ।
ब्रेन्टफर्ड कम्युनिटी स्टेडियममा आइतबार साँझ भएका खेलमा आर्सनलको जितमा विलियम सालिवा, गाब्रियल जेसस र फावियो भिइराले गोल गरे ।
खेलको १७औं मिनेटमा विलियम सालिवाको गोलबाट आर्सनलले सुरुवाती अग्रता लिन सफल भयो । उनले बुकायो साकाको पासमा गोल गर्न सफल भएका थिए । २८औं मिनेटमा गाब्रियल जेससले गोल गर्दै आर्सनलको अग्रता दोब्बर पारे । जेससले ग्रानिट झाँकाको पासलाई सदुपयोग गरेका थिए ।
४९औं मिनेटमा फावियो भिइराले गोल गरेपछि आर्सनल खेलमा ३–० ले अघि बढ्यो । त्यसपछि पनि घरेलु टोलीविरुद्ध लगातार दवाव बढाएपनि आर्सनलले थप गोल भने गर्न सकेन ।
यस जितसँगै आर्सनलको ७ खेलबाट १८ अंक पुगेको छ । समान खेलबाटै दोस्रो स्थानमा झरेको सिटीको १७ अंक छ । पराजित ब्रेन्टफर्ड ९ अंक जोडेर नवौं स्थानमा छ ।
