स्पेनिस क्लब रियल म्याड्रिडका फ्रान्सेली फरवार्ड करिम बेन्जेमाले पहिलोपटक बालोन डिओर अवार्ड जितेका छन् ।
बेन्जेमाले पहिलोपटक बालोन डिओरको अवार्ड जित्ने क्रममा लिभरपुल–बायर्नका साडियो माने र म्यानचेस्टर सिटीका केभिन डि ब्रुएनालाई पछि पार्दै यो अवार्ड जित्न सफल भएका हुन् ।
रियललाई २०२१–२२ मा च्याम्पियन्स लिग र ला लिगा जिताउन उच्च प्रदर्शन गरेका बेन्जेमाले ४६ खेलमा ४४ गोल गरेका थिए ।बेन्जेमा सन् १९९८ मा जिनेदिन जिदानपछि प्रतिष्ठित अवार्ड जित्ने पहिलो फ्रान्सेली खेलाडी बनेका छन् ।
‘मेरो अगाडि यो पुरस्कारले मलाई साँच्चै गर्व गर्छ । बेन्जेमाले भने, ‘जब म सानो थिएँ, यो बाल्यकालको सपना थियो, मैले कहिल्यै हार मानिन । जे पनि सम्भव छ । म यहाँको यात्रामा साँच्चै गर्व गर्छु । यो सजिलो थिएन, यो मेरो परिवारको लागि पनि गाह्रो समय थियो ।’
बेन्जेमा यस वर्षको अवार्ड जित्नेमा सबैभन्दा बलियो हकदार थिए । गत सिजन उनको ४४ गोलमा च्याम्पियन्स लिगमा पेरिस सेन्ट जर्मेनविरुद्ध ह्याट्रिक, चेल्सीविरुद्धको गोलसँगै म्यानचेस्टर सिटीविरुद्धको तीन गोल पनि समावेश छ ।
सन् २००९ देखि रियल म्याड्रिडमा रहेका ३४ वर्षिय खेलाडीले नोभेम्बर २० बाट कतारमा हुने विश्वकपमा फ्रान्सका लागि महत्वपूर्ण भूमिका खेल्ने अपेक्षा गरिएको छ । बालोन डी’ओर अवार्डका लागि विश्वभरका १०० पत्रकारले मतदान गरेका छन् ।
बायर्न–बार्सिलोनाका रोबर्ट लेवान्डोस्की, लिभरपुलका मोहम्मद सलाह, पिएसजीका केलियन एमबाप्पे, रियल म्याड्रिडका थिवाउट कोर्टुवा, रियलकै भिनिसियस जुनियर, रियलकै लुका मोड्रिच र बोरुसिया डर्टमुन्ड–म्यानचेस्टर सिटीका एर्लिङ ब्राउट हालान्ड शीर्ष १० मा रहे ।
ह्युङ मिन सन, रियाद महारेज, सेवास्टिन हालेर, फाविन्हो र भर्जिल भान डाइक शीर्ष १६ मा रहे । लुई डियाज, डुसान भ्लाहोभिच र क्यासमिरो संयुक्त रुपमा १७औं स्थानमा रहेका छन् । क्रिस्टियानो रोनाल्डो २०औं तथा ह्यारी केन २१औं स्थानमा रहेका छन् ।
ट्रेन्ट एलेक्सान्डर आर्नाेल्ड, फिल फोडेन र बर्नाडो सिल्भाले संयुक्त रुपमा २२औं वरीयता पाए । जोओ क्यान्सेलो योसुवा किम्मिख, मिक मेइगनान, एन्टेनियो रुडिगर, डार्विन नुनेज र क्रिस्टोफोर एनकुकु संयुक्त रुपमा २५औं स्थानमा रहे । यसअघि लियोनल मेस्सी (सात) र क्रिस्टियानो रोनाल्डो (पाँच) गरी १२ पटक यो अवार्ड जितेका छन् ।
महिलातर्फ २०२२ को सर्वोत्कृष्ट महिला फुटबलर बनेकी बार्सिलोनाकी एलेक्सिया पुटेलासले आफ्नो दवदवा कायम राख्दै महिला बालोन डी’ओर जितेका छन् । युरो २०२२ को विजेता इंग्ल्याण्ड र आर्सनलकी फरवार्ड बेथ मीड दोस्रो भइन् ।
बालोन डी’ओर २०२१–२२ सिजनको प्रदर्शनका आधारमा वर्षको उत्कृष्ट फुटबलरलाई प्रदान गरिन्छ ।
