जर्मन बुन्डेस लिगा फुटबलमा बार्यन म्युनिख विजयी भएको छ ।
गयराति भएको खेलमा बार्यनले उल्फवर्गलाई २–० गोल अन्तरले पराजित गर्दै लगातार दोस्रो जीत आत्मसाथ गर्न सफल भयो ।
बार्यनलाई जिताउनका लागि जमल मुसिआला र थोमस मुलरले एक एक गोल गरेका थिए ।
पहिलो हाफमा गरेका दुवै गोल नै बार्यनलाई जित्न पर्याप्त बन्यो ।
३३ औं मिनेटमा मुसआलाले गोल गरेपछि बार्यनले अग्रता लिएको थियो ।
त्यसको १० मिनेटपछि मुलरले व्यक्तिगत पहिलो र टिमका लागि दोस्रो गोल गरेका थिए ।
सोही अग्रतालाई बार्यनले दोस्रो हाफमा पनि कायम राख्न सफल भयो ।
बार्यन लगातार दुई खेलमा शतप्रतिशत नतिजा निकाल्दै ६ अंक जोडेर तालिकाको शीर्ष स्थानमा रहेको छ ।
पराजित भएको उल्फबर्ग पहिलो खेलमा बराबरीमा रोकिएकाले १ अंक मात्रै जोडेको छ र उ अहिले तालिकाको १५ औं स्थानमा छ ।
बुन्डेस लिगा अन्तर्गत अर्को खेलमा मेन्ज र युनियन बर्लिन भने गोलरहित बराबरीमा रोकिएका थिए ।
दुवै टिमले तालिकामा एक एक अंक थपेका छन् ।
दुवै टिमको समान ४–४ अंक भएको छ ।
तालिकाको पाँचौं स्थानमा युनियन बर्लिन रहेको छ भने छैटौं स्थानमा मेन्ज रहेको छ ।
