शीर्षस्थानमा रहेको क्याटलान क्लब बार्सिलोनाले स्पेनिस ला लिगामा ८ अंकको स्पष्ट अग्रता लिन सफल भएको छ ।
आइतबार राति घरेलु मैदानमा सेभियालाई ३–० ले पराजित गर्दै बार्सिलोनाले रियल म्याड्रिडलाई ८ अंकले पछि पार्दै उपाधि यात्रालाई थप मजवुत बनाएको हो । घरेलु मैदान क्याम्प नोउमा बार्सिलोनाको जितमा जोर्डी अल्वा, पाब्लो गाभी र राफिन्हाले गोल गरे । सबै तीन गोल नै दोस्रो हाफमा भएको थियो ।
खेलको सुरुवातदेखि नै पाहुना टोली सेभियालाई दवावमा राखेको बार्सिलोनाले गोलको लागि दोस्रो हाफ नै कुर्नुपरेको थियो । ५८औं मिनेटमा जोर्डी अल्वाले फ्रान्क केसीको पासमा गोल गर्दै बार्सिलोनाको गोलको खाता खोले ।
७०औं मिनेटमा पाब्ला गाभीले गोल गर्दै बार्सिलोनाको अग्रता दोब्बर पारे । उनले राफिन्हाको पासमा गोल गर्न सफल भएका थिए । त्यसपछि ७९औं मिनेटमा राफिन्हाले अल्वाको पासमा गोल गर्दै बार्सिलोनालाई ३–० को सहज जित दिलाए ।
यस जितसँगै शीर्षस्थानमा रहेको बार्सिलोनाको २० खेलबाट ५३ अंक पुगेको छ । समान खेलबाटै दोस्रो स्थानमा रहेको रियल म्याड्रिडको ४५ अंक छ ।
आइतबार राति नै रियलले रियल मलोर्कासँग १–० को अप्रत्यासित हार बेहोरेपछि अंक दुरी छोट्याउने अवसर गुमाएको थियो । पराजित सेभिया २१ अंक जोडेर १६औं स्थानमा छ ।
