श्रीलंकाले बंगलादेशमाथि दुई विकेटको रोमान्चक जित हात पार्दै टि२० एसिया कप २०२२ को सुपर फोरमा स्थान बनाएको छ । समूह बी बाट अफगानिस्तान समूह विजेता र श्रीलंका दोस्रो स्थानमा रहँदै सुपर फोरमा स्थान बनाएको हो ।
जितको लागि १ सय ८४ रनको विजयी लक्ष्य पछ्याएको श्रीलंकाले १९.२ ओभरमा ८ विकेट गुमाउँदै पूरा गर्यो । श्रीलंकालाई जितको लागि अन्तिम ६ बलमा ८ रन चाहिँएको थियो । स्पिनर मेहदी हसनले पहिलो बलमा एक र दोस्रो बलमा चौका खर्चिएपछि बंगलादेशको सम्भावना टाढिएको थियो । तेस्रो बलमा दुई र अर्को नो बलमा दुई रन खर्चिएपछि बंगलादेश औपचारिक रुपमा बाहिरिएको थियो ।
डेब्यू खेल खेलेका असिथा फ्रेनान्डो ३ बलमा २ चौकासहित १० रनमा अविजित रहँदै सुपर फोर पक्का गराए । श्रीलंकाका ओपनर कुशल मेन्डिसले ३७ बलमा ४ चौका र ३ छक्कासहित सर्वाधिक ६० रनको योगदान दिए । मेन्डिसले चार जीवनदान पाएका थिए ।
कप्तान दासुन शनाका ३३ बलमा ३ चौका र २ छक्कासहित ४५ रनमा आउट भए । स्पिनर महेदी हसनको १८ औं ओभरको पाँचौं बलमा शनाका क्याच आउट भएपछि श्रीलंकाको जित कठिन बनेको थियो ।
बंगलादेशका लागि डेब्यू खेल खेलेका तीव्र गतिका बलर एबादत हसनले ४ ओभरमा ५१ रन खर्चेर ३ विकेट लिए । तस्किन अहमदले ४ ओभरमा २४ रन खर्चेर २ विकेट लिए ।
त्यसअघि दुबई अन्तर्राष्ट्रिय क्रिकेट स्टेडियममा टस हारेर पहिला ब्याटिङ थालेको बंगलादेशले निर्धारित २० ओभरमा ७ विकेट गुमाउँदै १ सय ८३ रन बनाएको थियो ।
बंगलादेशका अफिफ हुसैनले २२ बलमा ४ चौका र २ छक्कासहित सर्वाधिक ३९ रन बनाए । ओपनर मेहदी हसन मिराजले २६ बलमा २ चौका र २ छक्कासहित ३६ रन जोड्दै राम्रो सुरुवात दिलाएका थिए ।
कप्तान सकिब अल हसन २४, विकेटकिपर मुश्फिकुर रहिम ४ र महमुदूल्लाह रियाद २७ रनमा आउट भए । मोसाद्देक हसन ९ बलमा ४ चौकासहित २४ रनमा अविजित रहे ।
श्रीलंकाका लेगस्पिनर वानिन्दु हसरंगाले ४ ओभरमा ४१ रन खर्चेर २ विकेट लिए । चामिका करुणारत्नेले ४ ओभरमा ३२ रन खर्चेर २ विकेट लिए । दिलशान मदुशनका, महेश थिक्सना र असिथा फ्रेनान्डोले एक एक विकेट लिए ।
समूह ए बाट भारत अपराजित रहँदै सुपर फोरमा पुगेको छ । शुक्रबार हङकङ र पाकिस्तानबीचको विजेता टोली सुपर फोरमा स्थान बनाउनेछ । त्यस्तै समूह बी बाट अफगानिस्तान अपराजित रहँदै यसअघिनै सुपर फोरमा पुगेको थियो ।
