फरवार्ड नेयमारले दुई असिस्ट तथा रिचार्लीसनले दुई गोल गरेपछि कतार विश्वकपअघिको मैत्रीपूर्ण खेलमा ब्राजिलले सानदार जित निकालेको छ । ब्राजिलले अफ्रिकी राष्ट्र घानामाथि ३–० को सहज जित निकालेको हो ।
फ्रान्सको ले हाभ्रेमा शुक्रबार राति भएको खेलमा ब्राजिलले पहिलो हाफको ३९ मिनेटभित्रै ३–० को आरामदायी अग्रता लिइसकेको थियो । त्यही तीन गोल नै ब्राजिलको जितमा पर्याप्त बन्यो ।
खेलको सुरुवातदेखि नै बल पोसेसन राख्दै खेलमा पकड बनाएको ब्राजिलले नवौं मिनेटमा मार्किन्हसको गोलबाट अग्रता लिएको थियो । उनले राफिन्हाको पासमा गोल गर्न सफल भएका थिए ।
२८औं मिनेटमा रिचार्लीसनले गोल गर्दै ब्राजिलको अग्रता दोब्बर पारे । उनले नेयमारको पासमा गोल गर्न सफल भए । ३९औं मिनेटमा नेयमारकै पासमा रिचार्लीसनले गोल गर्दै ब्राजिललाई ३–० ले अघि बढाए ।
दोस्रो हाफमा दुवै टोलीले केही अवसर सिर्जना गरेपनि थप गोल निस्कन नसक्दा ब्राजिल सहज जित निकाल्न सफल भयो । यस नतिजासँगै ब्राजिल कोपा अमेरिका कपमा अर्जेन्टिनासँग १–० ले पराजित भएयता १४ खेलसम्म अपराजित रहेको छ । जसमा ११ जित र ३ बराबरीको नतिजा छ ।
अब ब्राजिलले कतार विश्वकप २०२२ अघिको अन्तिम मैत्रीपूर्ण खेलमा ट्युनिसियासँग बुधबार प्रतिस्पर्धा गर्दैछ । त्यसपछि पाँच पटकको विश्व विजेता ब्राजिल कतार विश्वकपमा होमिनेछ ।
