नेयमार र एमबाप्पेको गोलमा पिएसजी विजयी

पिएसजीले टुलुजमाथि उसकै मैदानमा ३–० को सहज जित निकालेको हो । एक गोल जुआन बर्नाटले गरे । घरेलु टोलीलाई दवावमा राखेपनि पिएसजीले खेलको ३७औं मिनेटमा नेयमारको गोलबाट अग्रता लिएको थियो ।

लियोनेल मेस्सीको पासमा गोल गर्न सफल भए । उच्च लयमा रहेको नेयमारले यो सिजन फ्रेन्च लिग वानमा ५ खेल खेल्दा ७ गोल गर्नुका साथै ६ असिस्ट दिइसकेका छन् । उनले पिएसजीका लागि ६ खेलमा ९ गोल गरिसकेका छन् ।

५०औं मिनेटमा मेस्सीकै पासमा एमबाप्पेले गोल गर्दै पिएसजीको अग्रता दोब्बर पारे । इन्ज्युरी समयमा परिवर्तित जुआन बर्नाटले गोल गर्दै पिएसजीको जित पक्का गरे । बर्नाट ८३औं मिनेटमा नुनो मेन्डिसको स्थानमा मैदान छिरेका थिए ।

यस जितसँगै अपराजित रहेको पिएसजी ५ खेलबाट १३ अंक जोडेर शीर्षस्थानमा यथावत रहेको छ । समान १३ अंक नै रहेपनि लेन्स र मार्से गोल अन्तरमा पिएसजीभन्दा पछि छ । पराजित टुलुज ५ अंक जोडेर १३औं स्थानमा छ ।