एसी मिलानले इटालियन सिरी ‘ए’ को शीर्षस्थानमा रहेको नेपोलीमाथि सानदार जित दर्ता गरेको छ । नेपोलीले घरेलु मैदानमै मिलानसँग ४–० को लज्जास्पद हार बेहोरेको हो ।
मिलानको जितमा राफायल लियोले दुई तथा ब्राहिम डियाज र एलेक्सिस साइलमेकर्सले समान एक गोल गरे । स्टेडियो डिएगो अर्मान्डो म्याराडोना स्टेडियममा आइतबार राति भएको खेलको १७औं मिनेटमा राफायल लियोको गोलबाट मिलानले अग्रता लिन सफल भयो ।
२३औं मिनेटमा ब्राहिम डियाजले गोल गरेपछि मिलानले पहिलो हाफमा २–० को अग्रता लिन सफल भयो । ५९औं मिनेटमा राफायल लियोले सान्द्रो टोनालीको पासमा व्यक्तिगत दोस्रो तथा टोलीका लागि तेस्रो गोल गर्दै मिलानलाई सहज जिततर्फ अघि बढाए । ६७औं मिनेटमा एलेक्सिसले गोल गर्दै नेपोलीलाई घरेलु मैदानमै ४–० को लज्जास्पद हार चखाए ।
यस जितसँगै मिलान २८ खेलबाट ५१ अंक जोडेर तेस्रो स्थानमा उक्लिएको छ । पराजित नेपोली ७१ अंक जोडेर शीर्षस्थानमा रहेको छ । नेपोलीले शीर्षस्थानमा अझै १६ अंकको अग्रता कायम गरेको छ ।
