इंग्लिस प्रिमियर लिगमा टोटेनहम हटस्परले एभर्टनलाई पराजित गरेको छ । घरेलु मैदानमा टोटेनहमले एभर्टनलाई २–० ले पराजित गरेको हो ।
टोटेनहम हटस्पर स्टेडियममा घरेलु टोलीको जितमा ह्यारी केन र पिएरे इमिल होज्वजर्गले गोल गरे । टोटेनहमले पाहुना टोली एभर्टनमाथि बल पोसेसन राख्दै दवाव बढाएपनि गोलको लागि दोस्रो हाफमा पेनाल्टीको साहरा लिनु परेको थियो ।
५९औं मिनेटमा ह्यारी केनले पेनाल्टीमा गोल गर्दै टोटेनमलाई १–० को अग्रता दिलाए । गोलरक्षक जोर्डन पिकफोर्डले पेनाल्टी बक्समा केनमाथि नै फउल गरेपछि प्राप्त पेनाल्टीमा केन चुकेनन् ।
त्यसपछि ८६औं मिनेटमा पिएरे इमिल होज्वजर्गलेले गोल गर्दै टोटनहमलाई २–० को सहज जितसहित ३ अंक दिलाए । यस जितसँगै टोटेनहम १० खेलबाट २३ अंक जोडेर तेस्रो स्थानमा यथावत रहेको छ ।
समान २३ अंक नै रहेपनि गोल अन्तरमा एक खेल कम खेलेको म्यानचेस्टर सिटी दोस्रोमा रहेको छ । पराजित एभर्टन १० खेलबाट १० अंक जोडेर १४औं स्थानमा रहेको छ ।
