एजेन्सी – यूईएफए च्याम्पियन्स लिग अन्तर्गत समूह चरणमा छनोट हुन प्लेअफ अन्तर्गत अन्तिम चरणको दोस्रो लेग आज र भोली हुँदैछ । प्रतियोगितामा सहभागी हुने २६ टोलीको टुंगो लाग्दा प्लेअफबाट ६ टोली छनोट हुनेछन् ।
घरेलु लिगको स्थानकै आधारमा २६ टोलीले समूह चरणमा स्थान पक्का गरिसकेका छन् । आज र भोली हुने प्लेअफको ६ खेलपछि सबै ३२ टोलीको टुंगो लाग्नेछ । छनोट भएका टोलीलाई ४ पटमा विभाजन गरिनेछ । त्यसपछि हरेक पटका १-१ टोली छनोट गरेर ८ समूह छनोट हुनेछ ।
समूह चरण छिनोफानोका लागि पट १ मा रहने टोलीको छिनोफानो भइसकेको छ । च्याम्पियन्स लिग र युरोपा लिगको उपाधि विजेतासँगै युरोपको शीर्ष ६ लिगको विजेताले पट १ मा स्थान बनाउनेछन् । रियल म्याड्रिड, आइन्ट्राक्ट फ्रान्कफर्ट, म्यानचेस्टर सिटी, एसी मिलान, बायर्न म्युनिख, पेरिस सेन्ट जर्मेन, पोर्टो र आयाक्स पट १ मा छन् । यी सबै टोली ८ फरक समूहमा रहनेछन् ।
त्यसपछिका ३ पटको छिनोफानो क्लब वरीयताको आधारमा हुनेछ । हालसम्म स्थान पक्का भएका टोलीमा लिभरपुल, चेल्सी, बार्सिलोना, युभेन्टस, एटलेटिको म्याड्रिड, सेभिया, आरबी लाइप्जिग र टोटेनहम हट्सपर दोस्रो पटमा पर्ने सम्भावना छ ।
त्यसपछि बोरुसिया डर्टमुन्ड, साल्जबर्ग, शाख्तर डोनेस्क, इन्टर, नापोली, स्पोर्टिङ लिस्बन, बायर लेभरकुसन र मार्से रहेका छन् । यसबाहेक अब प्लेअफबाट आउने ६ टोलीले क्लब ब्रुगा र सेल्टिकसँग पट ४ मा पर्ने सम्भावना छ ।
प्लेअफ अन्तर्गत अन्तिम चरणको दोस्रो लेग आज र भोलि हुनेछ ।
२४ अगस्ट, मंगलबार
बेन्फिका विरुद्ध डिनामो किएभ (पहिलो लेग : किएभ ०-२ बेन्फिका)
रेड स्टार बेलग्रेड विरुद्ध मक्काबी हाइफा (पहिलो लेग हाइफा ३-२ बेलग्रेड)
काराबाग विरुद्ध प्लेजन (पहिलो लेग ०-०)
२५ अगस्ट, बुधबार
डिनामो जाग्रेब विरुद्ध बोडो ग्लिम्ट (पहिलो लेग : बोडो १-० जाग्रेब)
ट्राब्जोनस्पोर विरुद्ध कोपनहेगन (पहिलो लेग : कोपनहेगन २-१ ट्राब्जोनस्पोर)
पिएसभी विरुद्ध रेन्जर्स (पहिलो लेग २-२)
