खेलको इन्ज्युरी समयमा तीन गोल निस्कदा स्पेनिस क्लब एट्लेटिको म्याड्रिडले युइएफए च्याम्पियन्स लिगको समूह चरणको पहिलो खेलमा रोमाञ्चक जित निकालेको छ । घरेलु मैदानमा एट्लेटिकोले १० खेलाडीमा समेटिएको पोर्चुगिज क्लब एफसी पोर्टाेलाई २–१ ले पराजित गरेको हो ।
एट्लेटिकोको जितमा मारियो हर्माेसो र एन्टोइन ग्रिजमनले गोल गरे । पोर्टाेका मेटेअस युरिवेले एक गोल फर्काए । वान्डा मेट्रोपोलिटानोमा बुधबार राति भएको रोमाञ्चक र प्रतिस्पर्धात्मक खेलको ५०औं मिनेटमा कोकीले गोल गरेपनि गोलले मान्यता नपाउँदा घरेलु टोली अग्रता लिनबाट चुक्यो । ८१औं मिनेटमा पाहुना टोली १० खेलाडीमा समेटिन पुग्यो ।
मेदी तारेमी दोहोरो पँहेलो कार्ड खाँदै मैदानबाट बाहिरिएपछि एट्लेटिकोलाई केही सहज भयो । तर, बराबरीतर्फ धकेलिएको खेलको अन्त्यतिर तीन गोल सम्भव हुँदा एट्लेटिको विजयी हुन सफल भयो । इन्ज्युरी समयको थप गरिएको पहिलो मिनेटमा मारियो हर्माेसोले एन्जल कोरेआको पासमा गोल गर्दै एट्लेटिकोलाई १–० को अग्रता दिलाए ।
इन्ज्युरी समयको थप गरिएको छैटौं मिनेटमा मेटेअस युरिवेले गोल गर्दै खेललाई १–१ गोलको बराबरीमा ल्याए । त्यसपछि इन्ज्युरी समयको थप गरिएको अन्तिम समयमा एन्टोइन ग्रिजमनले एक्सले विस्टेलले गोल गर्दै एट्लेटिकोलाई २–१ को रोमाञ्चक जित दिलाए । यही समूहको अर्काे खेलमा बेल्जियन क्लब ब्रुगले जर्मन क्लब बायर लिभरकुसनलाई १–० ले पराजित गरेको छ ।
क्लब ब्रुगको जितमा एवाकर स्यालाले ४२औं मिनेटमा गरेको गोल नै निर्णायक बन्यो । यस नतिजासँगै समान ३ अंक जोडेपनि गोलअन्तरमा एट्लेटिको शीर्षस्थानमा तथा क्लब ब्रुग दोस्रो स्थानमा छ ।
अंक विहीन पोर्टाे तेस्रो तथा बायर लिभरकुसन पुछारमा छ ।
नतिजा समूह ‘ए’ – आयाक्सविरुद्ध रेन्जर्स (४–०) र नेपोलीविरुद्ध लिभरपुल (१–४)
समूह ‘बी’ – एट्लेटिको म्याड्रिडविरुद्ध एफसी पोर्टाे (२–१) र क्लब ब्रुगविरुद्ध बायर लिभरकुसन (१–०)
समूह ‘सी’ – बार्सिलोनाविरुद्ध भिक्टोरिया प्लेजेन (५–१) र इन्टर मिलानविरुद्ध बायर्न म्युनिख (०–२)
समूह ‘डी’ – फ्रान्कफुर्टविरुद्ध स्पोर्टिङ लिस्वन (०–३) र टोटेनहमविरुद्ध मार्से (२–०)
