इंग्लिस फरवार्ड ह्यारी केन चम्कँदा टोटेनहम हटस्परले इंग्लिस प्रिमियर लिगमा सानदार जित दर्ता गरेको छ ।
टोटेनहमले घरेलु टोली क्रिस्टल प्यालेसमाथि ४–० को फराकिलो जित आत्मसात् गरेको हो । टोटेनहमको जितमा केनले दुई तथा माट दोहर्थी र ह्युङ मिन सनले समान एक गोल गरे ।
सेलह्रष्ट पार्क लन्डनमा बुधबार राति भएको एकपक्षीय खेलमा सबै चार गोल दोस्रो हाफमा सम्भव भएको थियो । घरेलु मैदानमा क्रिस्टल प्यालेसले टोटेनहमलाई बराबरीमा रोक्न सफल भएपन दोस्रो हाफमा रोक्न सकेन ।
४८औं मिनेटमा केनले गोल गर्दै टोटेनहमलाई सुरुवाती अग्रता दिलाए । उनले इभान पेरिसिचको पासमा गोल गर्न सफल भए । ५३औं मिनेटमा ब्रायन गिलको पासमा केनले व्यक्तिगत र टोलीका लागि दोस्रो गोल गर्न सफल भए ।
६८औं मिनेटमा माट दोहर्थीले गोल गर्दै टोटेनहमलाई सहज जिततर्फ अघि बढाए । त्यसपछि ७२औं मिनेटमा दक्षिण कोरियाली फरवार्ड ह्युङ मिन सनले गोल गर्दै टोटेनहमलाई ४–० को फराकिलो जित दिलाए ।
यस जितसँगै टोटेनहम १८ खेलबाट ३३ अंक जोडेर पाँचौं स्थानमा यथावत् रहेको छ । टोटेनहमले चौथो स्थानको म्यानचेस्टर युनाइटेडसँगको अंक दुरी २ मा छोट्याएको छ ।
एक खेल कम खेलेको युनाइटेडको ३५ अंक छ । पराजित क्रिस्टल प्यालेस १७ खेलबाट २२ अंक जोडेर १२औं स्थानमा यथावत् छ ।
प्रिमियर लिगका अन्य खेलमा नटिङहम फरेस्टले साउथह्याम्टनलाई १–० ले पराजित गर्दा लिड्स र वेस्ट ह्यामले २–२ गोलको बराबरी तथा एस्टन भिल्ला र वल्भ्सले १–१ गोलको बराबरी खेल्दै अंक बाँडेका छन् ।
