फरवार्ड ह्यारी केनको निर्णायक गोलमा टोटेनहम हटस्परले इंग्लिस प्रिमियर लिगमा म्यानचेस्टर सिटीलाई पराजित गरेको छ ।
टोटेनहमले घरेलु मैदानमा सिटीमाथि १–० को जित निकालेको हो । टोटेनहम हटस्पर स्टेडियममा आइतबार राति भएको खेलको १५औं मिनेटमा केनको गोलबाट टोटेनहमले अग्रता लिएको थियो । उनले पिएर इमिल होज्वजर्गको पासमा गोल गर्न सफल भएका थिए ।
एक गोलले पछि परेको सिटीले त्यसपछि घरेलु टोलीमाथि लगातार दवाव सिर्जना गरेपनि टोलीको रक्षापङ्ति तोड्न सकेन । यता, टोटेनहमले भने आफ्नो अग्रता जोगाउँदै महत्वपूर्ण ३ अंक जोड्न सफल भयो ।
यस जितसँगै पाँचौं स्थानमा रहेको टोटेनहमको २२ खेलबाट ३९ अंक पुगेको छ । पराजित सिटीले शीर्षस्थानको आर्सनलसँगको अंक दुरी छोट्याउने अवसर गुमाएको छ । सिटीको २२ खेलबाट ४५ अंक रहेको छ । एक खेल कम खेलेको आर्सनको ५० अंक छ । आर्सनल अझै ५ अंकले अघि छ ।
प्रिमियर लिगकै अर्काे खेलमा नटिङहम फरेस्टले लिड्स युनाइटेडलाई १–० ले पराजित गरेको छ । नटिङहमको जितमा ब्रेननान जोन्सनले १४औं मिनेटमा गरेको गोल नै निर्णायक बन्यो ।
यस जितसँगै नटिङहम २० खेलबाट २४ अंक जोडेर १३औं स्थानमा उक्लिएको छ । पराजित लिड्स १८ अंक जोडेर १७औं स्थानमा छ ।
