चार वर्षको अन्तरमा फेरि एक पटक एशिया कप क्रिकेट प्रतियोगिता सुरुहुँदै छ । शनिबारदेखि सुरुहुने प्रतियोगिताको उद्घाटन खेलमा अफगानिस्तान र श्रीलंकाबीच प्रतिस्पर्धा हुने छ । फाइनल खेल भने ११ सेप्टेम्बरमा आयोजना हुनेछ ।
एशियाकपको इतिहास
एशियाकप क्रिकेट सन् १९८४ मा सुरु भएको थियो । पहिलो पटक यो प्रतियोगिता त्यतिबेला युएईमा खेलिएको थियो । यो संस्करण पनि युएईमा आयोजना हुँदैछ । पहिलो संस्करणको उपाधि भारतले जीतको थियो । अहिलेसम्म १४ पटक एशियाकप आयोजना हुँदा सर्वाधिक ७ पटकको च्याम्पियन भारत हो भने श्रीलंकाले ५ पटक जितेको छ ।
कतिपटक टी २० फरम्याट ?
सन् २०१६ मा पहिलो पटक टी २० फरम्याटमा एशियाकप आयोजना भएको थियो । बंगलादेशमा आयोजना भएको उक्त प्रतियोगिता त्यतिबेला टी २० विश्वकपको तयारीका लागि यस्तो गरिएको थियो । फाइनलमा घरेलु टोली बंगलादेश भारतसँग पराजित भएको थियो । यो संस्करण पनि टी २० फरम्याटमा हुँदै छ । अहिले पनि टी २० विश्वकप क्रिकेटको तयारी भन्दै यस्तो गरिएको हो ।
आयोजक श्रीलंका, भेन्यु युएई
एशियाकप क्रिकेटको आयोजना युएईमा हुँदै छ । तर यसको आयोजक राष्ट्र भने श्रीलंका हो । श्रीलंका अहिले आर्थिक संकटले गुज्रिएकाले यसको आयोजना स्थल युएई चयन गरिएको हो ।
सफल खेलाडी
एशियाकपका सर्वाधिक सफल खेलाडी सनथ जयसूर्या हुन् । श्रीलंकन जयसूर्याले २५ खेलमा १२२० रन बनाएका छन् । यसैगरी श्रीलंकाका लसिथ मालिंगाले १४ खेलमा २९ विकेट लिएर सर्वाधिक सफल बलरको रुपमा आफूलाई स्थापित गरेका छन् ।
एशियाकप २०२२ मा ६ टिमले भाग लिएका छन् ।
यी ६ टिमलाई २ समूहमा विभाजन गर्दा समूह एमा भारत, पाकिस्तान र हंङकङ तथा समूह बीमा श्रीलंका, अफगानिस्तान र बंगलादेश रहेका छन् ।
