एमबाप्पेको ह्याट्रिकमा पिएसजीको सानदार जित

पिएसजीले लिलमाथि उसकै मैदानमा ७–१ को फराकिलो जित दर्ता गरेको हो । पिएसजीको जितमा एमबाप्पेले ह्याट्रिक पूरा गर्दा नेयमारले दुई तथा लियोनेल मेस्सी र अचरफ हाकिमीले समान एक गोल गरे । लिलका जोनाथन बम्वाले एक गोल फर्काए ।

पिएसजीले पहिलो हाफमै ४–० को आरामदायी अग्रता लिदा दोस्रो हाफमा तीन गोल थप्दा एक गोल बेहोरेको थियो । लिलको मैदानमा आइतबार राति भएको खेलको ८ सेकेन्डमै एमबाप्पेको गोलबाट पिएसजीले सुरुवाती अग्रता लिएको थियो । उनले लियोनेल मेस्सीको पासमा गोल गर्न सफल भएका थिए ।

२७औं मिनेटमा नुनो मेन्डिसको पासमा मेस्सीले गोल गर्दै पिएसजीको अग्रता दोब्बर पारे । ३९औं मिनेटमा अचरफ हाकिमीले गोल गर्दै पिएसजीलाई ३–० ले अघि बढाए । हाकिमीले नेयमारको पासमा गोल गर्न सफल भएका थिए । ४३औं मिनेटमा नेयमारले गोल गरेपछि पिएसजी पहिलो हाफमा ४–० ले अघि बढ्यो ।

५२औं मिनेटमा नेयमारले हाकिमीको पासमा गोल गरेपछि पिएसजी खेलमा ५–० ले अघि बढ्यो । ५४औं मिनेटमा जोनाथनले गोल गर्दै खेललाई ५–१ को स्थितिमा ल्याए । त्यसपछिको पिएसजीको दुवै गोल एमबाप्पेको नाममा रहँदा उनले ह्याट्रिक पूरा गरे ।

एमबाप्पेले ६६औं मिनेटमा तथा ८७औं मिनेटमा गोल गर्दै ह्याट्रिक पुरा गर्दा नेयमारले पनि ह्याट्रिक असिस्ट प्रदान गरेपछि पिएसजी ७–१ को फराकिलो अन्तरले विजयी हुन सफल भयो ।

यो जितसँगै अपराजित रहेको पिएसजी ३ खेलबाट ९ अंक जोडेर शीर्षस्थानमा रहेको छ । पराजित लिल ४ अंक जोडेर १२औं स्थानमा रहेको छ ।