ब्राजिली विंगर एन्टोनीले एक गोलसँगै अर्काे असिस्ट प्रदान गरेपछि म्यानचेस्टर युनाइटेडले इंग्लिस प्रिमियर लिगमा सहज जित हात पारेको छ ।
युनाइटेडले घरेलु टोली नटिङहम फरेस्टलाई २–० ले पराजित गर्दै शीर्ष चारमा रहने सम्भावना बलियो बनाएको छ । द सिटी ग्राउन्ड नटिङहममा युनाइटेडको जितमा एक गोल डिएगो डालोटको नाममा रह्यो ।
खेलको ३२औं मिनेटमा एन्टोनीले गोल गर्दै युनाइटेडलाई पहिलो हाफमा १–० को अग्रता दिलाए । त्यसपछि ७६औं मिनेटमा डिएगो डालोटले गोल गर्दै युनाइटेडको जित पक्का गरे । उनले पहिलो गोल गरेका एन्टोनीको पासमा गोल गर्न सफल भएका थिए ।
खेलभर नै घरेलु टोलीविरुद्ध ६८ प्रतिशत बल पोसेसन राख्दै दवाव कायम गरेपनि युनाइटेडले थप गोल भने गर्न सकेन । घरेलु टोली नटिङहमले भने कुनै पनि समय युनाइटेडको पोस्टमा धावा बोल्न सकेन ।
यस जितसँगै युनाइटेड ३० खेलबाट ५९ अंक जोडेर तेस्रो स्थानमा उक्लिएको छ । युनाइटेडले न्यूक्यासल युनाइटेडलाई पछि पारेको हो । पराजिट नटिङहम ३१ खेलबाट २७ अंक जोडेर रेलिगेसन जोनको १८औं स्थानमा रहेको छ ।
