स्पेनिस ला लिगामा एट्लेटिको म्याड्रिडको फराकिलो जित निकालेको छ । घरेलु मैदानमा एट्लेटिकोले सेल्टा डि भिगोलाई ४–१ को जित निकालेको हो ।
घरेलु मैदानमा एट्लेटिकोको जितमा एन्जल कोरेआ, रोड्रिगो डि पउल र यान्निक कारास्कोले गोल गर्दा एक गोल उपहार पाएको थियो । सेल्टाका गाब्रियल भेइगाले एक गोल फर्काए ।
वान्डा मेट्रोपोलिटानोमा शनिबार राति भएको खेलको नवौं मिनेटमा एन्जल कोरेआको गोलबाट एट्लेटिकोले अग्रता लियो । ५०औं मिनेटमा रोड्रिगो डि पउलले गोल गर्दै एट्लेटिकोको अग्रता दोब्बर पारे । ६६औं मिनेटमा यान्निक कारास्कोले गोल गरेपछि एट्लेटिको सहज जिततर्फ अग्रसर बन्यो ।
७१औं मिनेटमा सेल्टाका गाब्रियल भेइगाले गोल गर्दै खेललाई ३–१ को स्थितिमा ल्याए । ८३औं मिनेटमा युनाइ नुनेजले आत्मघाती गोल गरेपछि एट्लेटिको ४–१ ले विजयी हुन सफल भयो ।
यस जितसँगै एट्लेटिको ५ खेलबाट १० अंक जोडेर चौथो स्थानमा उक्लिएको छ । पराजित सेल्टा ७ अंक जोडेर ११औं स्थानमा छ ।
