६ गोलका थ्रिलमा इंग्ल्यान्ड र जर्मनीले युइएफए नेसन्स लिगमा रोमाञ्चक बराबरी खेल्दै अंक बाँडेका छन् ।
दोस्रो हाफमा ३५ मिनेटको अन्तरमा ६ गोल निस्कदा इंग्ल्यान्ड र जर्मनीले ३–३ गोलको बरारी खेलेका हुन् ।
जर्मनीले दुई गोलको अग्रता लिएपनि इंग्ल्यान्डले उत्कृष्ट पूनरागमन गर्दै खेललाई बराबरीमा रोक्न सफल भयो । वेम्वली स्टेडियममा सोमबार राति भएको खेलमा जर्मनीका लागि काई हाभर्टजले दुई तथा इल्केए गुन्डोगानले एक गोल गरे । इंग्ल्यान्डका लुका सा, मासन माउन्ट र ह्यारी केनले गोल गरे ।
प्रतिस्पर्धात्मक खेलको ५२औं मिनेटमा इल्केए गुन्डोगानको पेनाल्टी गोलबाट जर्मनीले घरेलु टोलीविरुद्ध सुरुवाती अग्रता लिएको थियो । ह्यारी मगाएरले पेनाल्टी बक्समा जमल मुसिएलामाथि फउल गरेपछि रेफ्रीले जर्मनीलाई पेनाल्टी प्रदान गरेको थियो ।
६७औं मिनेटमा काई हाभर्टजले गोल गरेपछि जर्मनीले खेलमा २–० को अग्रता लिन सफल भयो । उनले टिमो वेर्नरको पासमा गोल गर्न सफल भएका थिए ।
त्यसपछि चार मिनेटमा अन्तरमा दुई गोल भएपछि इंग्ल्यान्ड खेलमा फर्किएको थियो । लुका साले ७२औं मिनेटमा रिस जेम्सको पासमा गोल गर्दै खेललाई २–१ को स्थितिमा ल्याए । ७५औं मासन माउन्टले बुकायो साकाको पासमा गोल गर्दै खेललाई २–२ गोलको बराबरीमा ल्याए ।
८३औं मिनेटमा ह्यारी केनले गोल गर्दै इंग्ल्यान्डलाई खेलमा ३–२ ले अघि बढाए । पेनाल्टी बक्समा जुड बेलिङघममाथि निकोले फउल गरेपछि रेफ्रीले भिएआरको सहायता इंग्ल्यान्डलाई पेनाल्टी प्रदान गर्दा केन चुकेनन् । ८७औं मिनेटमा काई हाभर्टनले सर्ज जिनाब्रीको पासमा गोल गर्दै जर्मनीलाई हारबाट जोगाए ।
यो बराबरीसँगै लिग ए ग्रुप ३ मा जर्मनी ६ खेलबाट ७ अंक जोडेर तेस्रो तथा इंग्ल्यान्ड ३ अंक जोडेर पुछारमा रहँदै रेलिगेसनमा परिसकेको छ ।
यही समूहको अर्काे खेलमा हंगेरीलाई उसकै मैदानमा २–० ले हराएर इटालीले फाइनल फोरमा स्थान पक्का गरिसकेको छ ।शीर्षस्थानमा रहेको इटालीले ६ खेलबाट ११ अंक जोड्यो । हंगेरी १० अंक जोडेर दोस्रो स्थानमा रह्यो ।
