लन्डन क्लब आर्सनलले इंग्लिस प्रिमियर लिगकाे शीर्षस्थानमा स्पष्ट ५ अंकको अग्रता कायम गरेको छ । वल्भ्सलाई २–० ले पराजित गर्दै आर्सनलले आफ्नो शीर्षतालाई थप मजवुत बनाएको हो ।
वल्भ्सको मैदानमा आर्सनलको जितमा दुवै गोल मार्टिन ओडेगार्डले गरे । घरेलु टोलीविरुद्ध बल पोसेसन राख्दै दवाव बढाएपनि आर्सनलले गोलको लागि दोस्रो हाफ नै कुर्नुपरेको थियो ।
५५औं मिनेटमा ओडेगार्डले गोल गर्दै आर्सनललाई १–० को अग्रता दिलाए । उनले फावियो भिएराको पासमा गोल गर्न सफल भएका थिए । ७५औं मिनेटमा ओडेगार्डको अर्काे गोल थप्दै टोलीको जित पक्का गरे ।
यस जितसँगै आर्सनलको १४ खेलबाट ३७ अंक पुगेको छ । दोस्रो स्थानमा रहेको म्यानचेस्टर सिटीको ३२ अंक छ । शनिबार राति नै ब्रेन्टफर्डसँग २–१ स्तब्ध भएपछि सिटीले आर्सनलसँगको अंकलाई घटाउन सकेन । पराजित वल्भ्स १० अंक जोडेर पुछारमा छ ।
